創業迷思

香港，每日都好多人開展自己創業之路。
當您睇呢篇文章既時候，您可能都有創業既心。
但創業係牽涉資金心力鬥志既一個考驗。
當然，無人話做生意必賺，但最少要減少失敗既機會。而其中最重要既係，你首先要攪清楚自己踏出呢一步既原因。即係所謂創業初心。我20歲已經開始創業，雖然都唔算係咩大生意，但亦算有相當經驗心得。而且經常接觸到不同既創業朋友，當中大致係以下幾個原因，但亦牽涉唔少迷思，以下同大家分享下。

【打工好辛苦】

打工好辛苦，係，但再辛苦都係你返工既時間，或者加班既時間。但做老闆呢？基本上24小時都為生意費心，跑業務，人事分配，資金調動，宣傳發展，基本每時每刻都係解決問題。你所要付出既心力絕對比打工辛苦N倍。所以創業你首先自問係咪做好左思想準備未。

【想過下老闆癮】

為做生意而做生意係好危險既諗法。如果未有充份認識同準備就去衝，分分鐘唔攪攬住筆資金休息下仲好。我舉個例子，以前經常聽女性朋友講，我想開間時裝店做老闆，但既無經驗亦無計劃，純為想做老闆而開店。結果係買左堆衫守喺間鋪，日日等朋友黎坐下傾下計。過得一年半載蝕一百幾十萬離場時仍唔係好知零售既經營方法。

【我有個好好構思，必定掂架】

創意好寶貴，但好創意仍雖配合經營力，您如果無經營力又夾硬要靠自己營運，咁再好點子既生意都唔易獲得長久成功。

【聽講XX幾好賺】

有時某些行業會忽然爆紅，人人搶住去做。但潮流既野快來快去，你接手時可能已經潮流已近水尾，分分鐘只係變左接盤俠。

【我有老友好熟門路，預我一份】

同一個有經驗既朋友合資係好，只係要分工清晰，大家就出資，分工等先傾清楚。否則因財或因權失義，連朋友都無埋，就絕對唔值啦。

希望以上既分享唔會令你喺創業大門前卻步。事實上創業係充滿無限可能既冒險。有挑戰有汗水有眼淚。但亦係令您能一展才能，拓展眼界人生閱歷既過程。只要心態正確，準備充足，仍然係值得嘗試既。